“भीमनगरच्या रहिवाशांना आहे त्याच ठिकाणी घरे देऊन न्याय द्यावा”, मेधा पाटकर यांची मागणी

पुणे : भीमनगर वाचविण्यासाठी रिपब्लिकन युवा मोर्चाचे अध्यक्ष राहुल डंबाळे यांनी केलेल्या आवाहनानुसार, समाजसेविका मेधा पाटकर यांनी भीमनगरला भेट देऊन भीमनगरवासीयांच्या भावना आणि अडचणी जाणून घेतल्या. तसंच न्यायासाठी सुरू केलेल्या आंदोलनाला पाटकर यांनी पाठिंबा दिला आहे. यावेळी देविदास ओहाळ यांच्यासह स्थानिक रहिवासी उपस्थित होते.

समाजसेविका मेधा पाटकर काय म्हणाल्या? : “झोपडपट्टी पुनर्वसनासाठी पौड रस्ता येथील भीमनगरच्या रहिवाशांची सहमती नसताना देखील, घरे खाली करण्यासाठी झोपडपट्टी पुनर्वसन प्राधिकरणानं दिलेली नोटीस मागे घ्यावी. भीमनगरवासीयांना आहे, त्याच ठिकाणी घरे देऊन योग्य न्याय मिळवून द्यावा,” अशी मागणी जेष्ठ समाजसेविका मेधा पाटकर यांनी केली आहे.

भीमनगरवासीयांची फसवणूक : “भीमनगरच्या पुनर्वसनासाठी भक्ती इंटरप्राईजेस संस्थेनं भीमनगरवासीयांना मोठमोठी आश्वासनं दिली. त्याच जागेवर चांगली घरे देण्याचं मान्य केलं. प्रत्यक्षात नियमाप्रमाणे वस्तीतील 70 टक्के कुटुंबांची सहमती मिळण्यापूर्वीच 50 कुटुंबांना वारजे येथे पाठवण्यात आले. त्यापैकी पंधरा कुटुंब भीमनगरमध्ये परत आले. या कुटुंबांना ज्या ठिकाणी पाठवण्यात आलं, ती इमारत सदर विकासकानं नव्हे तर महापालिकेनं बांधल्यामुळं उर्वरित 35 कुटुंबांना जागा खाली करण्याची नोटीस देण्यात आली. एक प्रकारे ही भीमनगरवासीयांची फसवणूकच आहे,” अशी टीका पाटकर यांनी केली.